Mi zokhalin Nui’ sunlawizia kan thei cio. Asinan sumpai ih tahthim dan kan thiam lo ding.

Nitin Nui’ hnatuan, a tuanvo pawl cu midang tuanter in, midang fial sehla sumpai ziangzat lai a cem ding tiah USA ih Nui’ dinhmun zohfiangtu ‘insure.com’ ih senior managing editor Amy Danise cun a tlangpi in a ngan suak.

Amy Danise cun nitin ‘insurance information’ thawn pehpar in Nu pawlih hnatuan cu kumtin US$ 61,436 a man tiah a ti.

A tlangpi in (a cipciar si loin) Nu pawlih nitin hnatuan cu fa le hrang rawl suan, innsang ah fa le pawl kilkhawi, fa le pawl tlawng inn ih thlah, innsang thianghlimter, innsungsang hrang a tulmi pawl tawlrel an si.

Nu (mother) nei lotu cun nitin innsang thianghlimternak dingah hnen -um (house maid) man nazi pakhat ah US$ 9.40 hrawng cem a tul ih, cucu kum khat hrangah US$ 7,104 a si ding. Tlawngkainak dingah mawtaw mangtu (driver) sannak le feh suksohnak hrang nazi pakhat ah US$ 13.43 cem a tul dingih cucu kum khat sungah US$ 6,285 cemnak a si.

Nu nei lotu cun ‘nau umnak hrangah’ nazi pakhat ah US$ 17.90 lai a cem thei ih, nauhak pawl umnak kilkhawinak ah nazi pakhat ah US$ 24.99 tiang a cem. Cu pawl cu ‘nursing school’ lenglam ih Nui’ hnatuan ding pawl an si. Amy Danise cun nauhak hrang Nui’ hnatuan pawimawhbik (14) a lawrkhawm pawl cu midang fial an si ahcun kum khat sungah US$ 61,436 a cem ding ih, cumi lengah innsang pabik hrangih a tuah sakmi pawl rel ding tampi a um lai tiah a ti