Ngura

KA KHUALTLAWNNAK ROCK

Ka lamzin cu Lai khawte lam Tiphei tiva le Laikua fehnak zin lung [Rock] ti reprep lakih feh can, Rih maw`aw zin parih ti bumbawi’ feh can, cun ke pahnih nei lengte thawn ti roroih tlan can le Expressway [Highway] parih taw za vohvawi tlan can pawl khi an si.

Middle School ka kai laiah ka duh zetmi Cinderella thu ka rak thei dah.  Ni khat cu tlawnginn kiangah thirpheng thinlung zuk bang Steelheart ka hmu ngelcel.  Cun fur lai a si vekin maw`aw zin cu ciarbekin a khatih maw`aw fehnak keneh Skid Row pawl cu kawi ngiatngiatin an um.  Sun khat cu hramlakah ka vak ih, rul var White Snake cu rinlopin ka hmu.  Khua ka hun tang ih, mupipawl Eagles cu ti ziaizoten an zam hai.  Cun ka umnak kiangih thingkungpi ka hun zoh cu a parah tlangakpawl Black Crowes an rak fu `hep`hep.  Tlang par lamah ka hung so vivo ih, tlangkaikuangpawl Scorpions cu ti kuakoin an rak vak ciamco.  Cu mi sun cu ka vahnak ah ka bang nawn ih, ka mit ka `hep kohkoh Blink 182 lai a si ding.  A zan khal ka lu a na nawn ih, sii ei ding ka hawl laiah sii dawng pakhat ah cun Poision tiih ngan mi ka hmu ih, a tham hman ka tham ngam lo.  Tikcu can  a her vivo ih, thla a hung tang thlang.  Zing khat tla cu mero zingin a khatih Great White pi ti ding a si ko.  Cun Khrismas a hung thleng leh ih, sathattu Slaughter pawl cu ka titheitawk ka hung bawm ve.  Khua a hung `hal vivo leh ih, sun khat cu vansiat ah khawpi tei’ inn pakhat a kang ngelcel ih, bawm ve dingin ka va pawk ve cu a kangdan a bese tuk zo FireHouse vekrori a si ih, tingaihnak a um nawn lo a si hi ka ti phawt mei.  A kiangkap tla cu meikhu zamin a khat Smokie rori a si ko.  Cui `um `hal ni 41 Sum 41 sung hrawng cu kum dang hnakin a sa hleice cuang khin ka thei.

Cun ka rung suk vivo ih, khaw pakhat ah cun ‘mai thu thaw mai vawih thaw’ ti bangin mai hmuhdan le ruahdan lawng `ha ih thei, khatlam ah cu mai hnam le miphun `an thei zet si Extreme ve zet pa pakhat ka hmu ih, reilote ka vung leng hngehnge.  An khawlak in vahpi ih, heavy weight pa tum emem pa pakhat ka hmu ih, Mr. Big a si khi tin ka sim zawk rero.  Cun ka rung suk thla vivo leh ih, khawpi pakhat ah ka thleng.  Ni khat cu umharphen ah ramsa hmuan ka va zoh ih, Leopard ti mi Def Leppard le pawpi rang White Lion pawl ka va hmu cu an pa ka ti nasa.  Inn ka rat tlung cu lek`hik meisa a ra lo ih, AC/DC khal a um nawn ta lo.  Ka rualpi tei’ inn lamah va leng men keng tin ka va cu an inn sungih ret mi meithal le an inn hmaiih rose parpawl Guns 'N' Roses cu ka va zoh nasa.  Cu hnuah an inn ih thilripawl ka hun zoh cu toy thirih tuah mi fala lem Iron Maiden tla an rak nei khi a rak si.  An hmuan le an inhnen tei’ hmuan cu a pehaw, duhduh ih fehtlang theih Linkin Park khi a si mei. 

Cun tlawng a hung pit ih, ramdang feh dingin Europe lam ka tum deuh nan remcang thei lawn ram dangah ka feh.  Ni khat cu an ram ihHighway`ha bik lamah duhtawk tei ka hun tlan taktak cu Deep Purple ih 'Highway Star'maw ka si ti pangnak.  Cawlhni zing khat cu an local church lakih tum bik lam pakhat ah ka va khawm ve ih, Praise ‘N’ Worship an hruaiawkdan le an hlasahdanpawl cu an phurin an nuamaw hai tuk Collective Soul vek rori an si.  Kei khal cu an duhtak maw si tin ka theitawkin ka au in ka khir ve nasa.  Sun khat cu khuilamih Queen si maw thawn kan tawngaw ngelcel ih, cumi ni cu Green Day a si ko.  Ruah ban loin kan thuhla a `ha vivo ih, zan khat tla cu zumlopin Kiss ka ngah ta riai.  A zan cu zanvarin Dream Theater sungih um vek rori khi ka si.  Tikcu a hung rei vivo ih, ziangti`ha Ozzy Osbourne vekin 'Goodbye To Romance' ti a `ul tariai.  Cu cun Cinderella ih 'Heartbreak Station' le Steelheartih 'She’s Gone' vek a si ko.  Cu ti cun Nazareth thu lamlam tla ka vun ruat phah nasa.

Cui hnu sun khat ka off ni cu Music Store pi pakhat ah ka va vak ih, ka rak hngah le hawl rero mi Aerosmith, Bon Jovi, Dio, Tesla, Kingdom Come, Motley Crue, Judas Priest, Metallica, Manowar, Helloween pawlihCollection/Compilation/Greatest Hitsle The Best album-pawl ka hmu cu hleuhhli dah tin ka lak lohli hai.  Cutin a zan cu diriam nawn in Rod  Steward ih 'The best day of my life'vek a sisi ti phahin elbam thar pawl cu zoh thul, ngai thul in ka um rero.

xxxxxxxxxx

Kan Baibal sungih “Suah can a um ih thih can a um, phun can a um ih phawi can a um …” ti bangin feh can a um vekin tlun can a um a `ul ve thlang.  Scorpions bangin Holiday ka la ta.  Innlampawlin in rak fawn [phone] ih Cinderella vekin Coming Home ka ti hnu ah ka nu thawn kan beaw leh ih, Ozzy Osbourne bangin Ma ma, I’m Coming Home ka vun ti lala.  Rualpipawlin, “Ziangtiksaw na tlun ding?” tin in sut ih, Europe vekin Tomorrow ka ti hai.  Cun zo thawn, mi paziat nan si ding? in ti lala ih Metallica bangin One ka ti bubbi mei.  Ziangkhal sisehla, kan tikcucan cu Motley Crue ih Time For Change vek a sisi, tin White Lion vekin Farewell To You ka ti ta hai.

A thaisun cu ka pawksuak zik ngaingai thlang.  Samthlairemte pakhat cun Steelheart bangin I’ll Never Let You Go, Take Me Back Home i ra ti ciamco ih, kei khal tingaihnak thei lo cun ka awkam thiamtawk suah in Motley Crue vekin You’re All I Need, Without You, Poison vekin I Won’t Forget You, Firehouse bangin I Live My Life For You le White Lion vekin Till Death Do Us Part tipawl in ka vun hnem ve.  Cu cun a mit khua a dur `uam`o ih, G N R bangin Sweet Child O’ Mine, Don’t Cry tin le Ozzy Osbourne vekin No More Tears ka vun ti bet hnu ah Great White bangin Big Goodbye ka pek ta.  Airport lam pan in ka pawksuak ngaingai thlang.  Cu mi hnu cu umdan a har ve nasa, Metallica ih Sad But True le Cinderella ih Hard To Find The Words vek rori a si ko.  Minit 5 sung hrawng tla cu Pantera ih 5 Minutes Alone vek kha a si mei.

Airport ka thleng thlang, a sungah ka vung lut zikih Security guard pa in Damn Yankees vekin Where You Going Now? i rak ti ih, Linkin Park bangin Some Where I Belong le Europe vekin Home Land ah ka vun ti.  Cun Discman thawi’ hla ka ngai phah rero kha a hmu ih, “Ziang hla saw na ngai rero?” tin i sut bet ih, Tesla ih Love Song pawl famteh ka ti lala.  Cu mi hnu rei lo te cun Aerosmith bangin kan Fly Away From Here ta thlang.  Home Land lam cu kan thleng thlang.  Pum za vohvawi kan `um hnu ah Iron Maiden ih Blood Brothers thawn tla kan tawngaw hai ih, kan cibaiaw hai.  Innlampawl cun Metallica ih Welcome Home tin le Motley Crue ih Home Sweet Home ti phahin in rak hmuak hai.

A zan cu Scorpions ih Black Out vek rori a si ko, kan thim remrem thluh aw. Ozzy bangin ka So Tired nawn ruangah Iron Maiden ih 2 Minutes 2 Midnight tiang ka men hnu cun cawlhahdam in ka it huahhi.  Buainak le harsatnak zianghman tawng loin tluangtei innlam ka ra thlensal thei ruangah Iron Maiden bangin Hallowed Be Thy Name tin thlacam phahin Pathian hming ka thang`hat.  A thaisun cu sungkhatunau pakhat kan inn ah ra dukdi khaw “Ziangtikahsaw na ra tlun?” i ti ih, G N R vekin Yesterday ah famteh ka ti.  A hmai kar hrawngah rualpipawl in Concert a um tin in ra sawm ih, Blink 182 ih The Rock Show cu kan va zoh hai.  Hi tikcucan hrawng hi fur can a si ruangah Nazareth ih Everytime It Rain a si ko.

Zan khat cu khatlamral ih samthlairemte cun in rak fawn khaw Skid Row vekin I Remember You i ti ih, kei khal cun Blink 182 bangin I Miss You, cun Pink Floyd vekin Wish You Were Here ka vun ti ve.  Cutiih ka ti cing cun a thin a nuam thei cuang lo ih, Slaughter ih You Are The One, Scorpions ih Still Loving You le Extreme ih More Than Words hokhaw a si ka vun ti hnu lawngah Great White vekin Alright a tithei lehsal.

Cutin pawlkawmlam ah tla ka hun tel ve hnelhno ih, ni khat cu Extreme ih Rest In Peace pakhat a um ta riai.  Zan khat zan cu pawlkawm hmin in khawhar kan va topi ih, inntekte cu Metallica ih To Live Is To Die hokhaw a si tin ka thiamtawkte cun ka vun hnem ve nasa.  Pawlkawmlam cangvaihnak ih ka titheitawktei ka ti mi sunte cu Creed bangin My Sacrifice a si hi ka ti.  Thil umtudan, nuntukhawsakdan le nundanpawl ka thlir rero tikah Collective Soul ih The World I Know a si hi ti phahin a netnak ah Creed vekin What’s This Life For? tin ka au ruangro …!

Rock Siangpahrang OZZY OSBOURNE

Leilungtlun Rock thuanthu le thuhla rel tikih hrelh theih lo ding le cuai thei lo ding mi pakhat cu Rock pu an ti mi Ozzy Osbourne hi a si. Anih hi 03 December 1948 kum ih suak a si ih, Rock awnmawi atcilhtu pakhat a si ve. Hi tivekih mi theih a si hlan, Rock khawvel ih a luh hlanah cun sathahnak hmunah hna tuanin a rak um rero dah.

Ozzy hin amai’ bulpak ta “awnmawi suahnak dawrpi” Ozz Records le Protools Studio a nei ve. A nupi Sharon Osbourne hi a Manager a si ih, a hna bawmtubik khal a si. Studio a din hnu cun a elbampawl cu amai studio ah dunthusamin a tawlrel theu. A fanu Kelly Osbourne khal hi leitlun Alternative nunau lakih hmin lang thei zo pakhat a si ve. Ozzy upat peknak le sunlawihnak ah ti’n thangthar benpawl in amai’ hla hlir sakin “Tribute” elbam tla an suah rero zo. Cun amai hmin pu in Rock benpawl kawmkhawm in 1997 ihsin “The Ozzfest” ti’n kum tin deuhthaw awnmawi puaipi an tuah theu. Ozzfest 2007 tla cu Free Tickets / Free Show  in an tuah ih, tiket ziangmaw zat man um loin an zemsuak. Tui tum ih an zemsuah mi tiket hi tui hlan US ih free show  tuah mipawl hmuahhmuah lakah a tam bik, ti a si. Cun 2006 kum ihsin VH1 ih tawlrel thawk mi, Rock thuhla ih mi ciahnehtu le Rock thuanthu ih mi sunlawihtlak laksawng, “VH1 Rock Honors 2007” cu Ozzy in a ngah ve.

A elbampawl lakah 1995 kumih suak Ozzmosis  hi a hlawhtling lam pakhat a si ve. Leitlun pumhuap ah 3 mils. leng zuarkhawng thei mi a si ih, Tour  an feh can khalah mipi million laiin tha an rak pe theu. Elbam a suah veten zarh khat sungah America ih zuarkhawng theibik Top Ten lakah a lut cih fawn. Hi elbam a suah pekah “Ozmosis ti mi cu ziangtinak ha a si…?” tiih an suh tikah, “Kei tla ka thei ve lo, tui hlan kum 12 hrawng rei zo ahkhan, ‘elbam thar na suah tikih na hmanawk ah….’ tin Motley Crue ih Bassist ‘Nikki Sixx’ ih in pek ta mi a si” a ti.

Ozzy hi a hlanah rittheihthil a rak tham ve dah ih, a rak talbuai thei ve nasa. Tum khat tla cu a ri tukih a nupi rori hman thah a rak tum dah. Asinan lehhnuah cun rittheihthil thawn thiarfihlimaw in a um thei sal. A elbam netabik “Black Rain” khal hi a elbam dang lakah rittheihthil thawi hnamhnawihaw lo mi elbam thiangbik a si, a ti. “Hlanih ka umtudanpawl ka vun ruah sal tikah mangsia pi vek khi a si ko, mai duh mi nupi rori hman thah tum tete, a netnakah cun palik kutah ka thleng ih, thawng ka tla ko…” tin a lehhnuah a rel sal. 1984 kumih “So Tired” MTV an zuk laiah khan thlalang kuai themin a dang a sun ngah pang ih, asinan vanthatah a aw zianghman siatsuahaw loten a um.

Leitlun awnmawi mipi in Ozzy tiih an theih thawknak cu Black Sabbath [BS] ben ih a um lai ihsin a si. BS hi 1969 January ah England, Birmingham ah Tony Iommi [Guitars], Geezer Butler [Bass], Bill Ward [Drums] pawl thawn an rak din. Amah hi hlasaktubik [Lead Vocalist] dinhmun in a um ih, an elbam suah hmaisabik “Black Sabbath” khal an hlawhtling zet. BS ah kum 10 sung a tel hnu in a suak ih, amah te’n a ding. Cuhnu cun BS ih hlasaktu le sungtelpawl khal mi dangdang an thlengaw rero. Ozzy amah tei’ a din ahhin tumtu mi dangdang a sawm theu. Asinan 1999 ahcun BS sungtel hlun pawl thawn kawmawsal in “Reunion” ti’n Tour an feh khawm hai ih, a lehhnu ah Live elbam in tla an run suahleh.

Ozzy le a Guitarist ‘Zakk Wylde’ hi an kaihawin an ngaihaw thei zet. Hla tam tak an phuah tlang ih, elbampawl khal an tawlrel tlang theu. Ozzy ih hla mawi le tha zet pakhat “Ma Ma I’m Coming Home”  hi an pahnih ih phuah mi a si ih, a netabik elbam “Black Rain” khal hi an pahnih ih tawlrel mi a si thotho. 1987 kum ah Ozzy in a Guitarist ‘Jake E. Lee’ aiawhtu ding a hawl ti kha Zakk in a theih tikah Demo Tape a hi kuat. A pekah cun Ozzy in a rak “aw” lohli lo nan a Drummer ‘Randy Castillo’ in ko sin dingin a fawrh ih, a nupi cun ra dingin vanzam tiket a hi leihsak. Hi laiah Zakk cu Petrol dawr ah hnatuan in a rak um rero. Cutin tu tiang rualpi tha ah an cang ta.

Ozzy ih elbam netabik “Black Rain” a suah hlante ah, “Total Guitar [TG]” mekazin ih hnatuantupawlin Holly Wood, Los Angeles ah Ozzy le Zakk Interview an va tuah mi cu Total Guitar 2007 June issue ah an run suah…

Ozzy cu amai style le design vekten mitkharh hlumte thawn, a sam dum sau a a laiih phialin thuamhnaw dum le luruh lem rangte thawn Sofa parah cun a rak to themthem. Vun zoh hruak cun John Lenon vek no zet lai khi a bang. A kiangah cun a rualpi Guitarist Zakk cu sam sau senrang nawn thawn ti hmiamhmiamin a to ve. TG-pawl cu an vung luh veten “Hey… hlan vekin pi 14 ziangmawlo pi kha na hnenah a um lai maw…?” tin Zakk in a rak capoh hai ih, TG-pawl cu midang maw a biak ding tin an vun hawi ih, midang le zohman an um fawn lo, cutin “Aw… in rak hmuak tha hai a si hi…” tin TG-pawl khal cu an um a nuam sutsi rori.

A rei hlanih ra suak mei ding an elbam thar “Black Rain” thawn pehparawin an thu cu an vun thawk. Mallai an rel hnu cun thu dangdangah an lut. Hnihsuak an sai phahphah ih, an zaten an hni vualvo phahphah. Pakhatin thu dang a rel, pakhatin thu dang a run rel lala, thu dangdangah an kat vivo. Khuahlanih zuknung an zoh hmaisabik mi thuhla, Zakk in G n’ R ih Show a zoh hmaisabik thu, Ozzy in Black Sabbath thu, cun Journalist-pawl an cu ti, an kha ti thupawl tin an rel vivo hnuah an thu cu rei lote a cat lawk. Umm… a remcang thlang tin TG-pawl cun thu pakhat an vun suh man hlante ah Ozzy in thu dang pakhat a run peh lala. Khuahlanih “Diary of A Madman” Tour an feh laiih miniam tete pawl thu ah an kat lala. TG-pawl cu an rak ruahman cia vek cu a si lo nasa. Mai duhduh rel, mai duhduh tawng, mai duhduh suh tivekah an cang thla thluh.

A netnakah cun “Na thuhla teh ziangtikah saw na ngan ding…? tin ka nupi in i sut. A buaithlak mi cu zianghmanhman ka cing nawn lo, ka thuanthu ah palap le tlangakpawlin an khat. Hivek teh mipi in an ngaihsak duh kei maw. The Osbourne TV series cu mipi in an duh zet ko. Ziangahtile, a lengah ziangtivekin ka khawsa ti an thei duh. Inn rappi sungah umin zan tin luanglu parah kaiin thlaiaw ringring dingah in neih hai…” tin Ozzy in a sim. Cu veten Zakk cun “Ozzy, thuthang lo pek ding ka nei, mi tui na rel mi kha a dik rori” a tiih cutin an interview-awk cu an theh ah a cang...    

A hla tha deuhdeuh le hit hrekkhat pawl cu; Goodbye to Romance, Ma Ma I’m Coming Home, Crazy Train, I Just Want You, You’re No Different, Fire in the Sky, No More Tears, Paranoid, … tvk. an si. A elbam netabik “Black Rain” ahcun a tumtu ah Zakk Wylde: Guitar, Rob "Blasko" Nicholson: Bass, Mike Bordin: Drums pawl a hmang ih, hi elbam sungih hit deuh pawl cu The first new single: I Don't Wanna Stop, Lay Your World On Me, Here For You, Black Rain, tvk. an si.

Ozzy Osbourne ih elbam suah zo mipawl le suah canpawl;

01. Blizzard of Ozz                      [15 January 1981]

02. Diary of a Madman                [07 November 1981]

03. Bark at the Moon                  [10 December 1983]

04. The Ultimate Sin                   [22 February 1986]

05. Randy Rhoads Tribute            [19 March 1987]

06. No Rest for The Wicked         [22 October 1988]

07. Just Say Ozzy                       [17 March 1990]

08. No More Tears                      [19 October 1991]

09. Live & Loud                          [28 June 1993]

10. Ozzmosis                              [23 October 1995]

11. The Ozzman Cometh              [11 November 1997]

      [The Best of Ozzy Osbourne / Compilation]

12. Down to Earth                     [16 October 2001]

13. Live At Budokan                    [25 June 2002]

14. Under Cover                        [01 November 2005]

15. Black Rain                            [22 May 2007]

MINO & ROCK

Minung kan si hnuhnu cun duhzawng kan nei cio. Mi tampiin a thlum le a al kan duh laiah hrekkhat cu a pak, a kha rak duh kan um, a thak zetzet tla thaw rak ti zet khal kan um lala. Cuvekin awnmawi khalah mi tam sawnin a dai, a nem le tingiahngotepawl ngai nuam an ti laiah a sa deuh, a khoh deuh le ti rupro deuh pawl ngai nuam rak ti zet khal an um lala. Hrekkhat cuhnakih rura sawn hman thaw rak ti zet tla an um lailai.

Rock tiih kan sal veten mi tam tak cun tihnung rapthlak, thil tha lo le Pathian duh lo zawngah maw kan ruat deuh theu. Thil ziangkimah hin a sia le a tha hi an rak um ringring ih, thil tha zet kan ti mipawl lakah a siatnak tete an rak um ve theu vekin thil sia kan ti mipawl lak khalah a thatnak tete hi an rak um ve theu. A thupibik cu a sia le a tha kan thlir thiam ih, a siatnak tete kan hrial thiam ding kha a si ko. Rock hmuahhmuah hi an tha thluh, a siatnak zianghman an um lo, ti cu si loin thil sia le setanlam [Satanic] lawnglawngih hmuh ding khal cu a si lo lala fawn. Asile, mi tam sawnih tha le tluangtlam zetih kan ruah theu mi Country, Pop, tvk. ahhin a siatnak zianghman an um lo tinak maw a si ke? Hipawl lak khalah a siatnak tampi hmuh ding an um ve ko. Pop hrekkhat tla cu Rock-pawl hnak hmanih luar le bese sawn an tampi. Sakhua lam khalah Khristian Rock ben tampi an um ve ko a sisi.

Minung kan nunnakah a mawi le a tha lawnglawng le tluangtlam zawng hlirih feh a theih lo ti hi awnmawimi hmuahhmuah in an rak theithiam thluh. Hi hi khuahlanpi ihsin Beethoven hman hin tuan mahmahin a rak thei zo sawn khi a rak si. A thinhengnak, duhamnak, lungkimlonak, riahsiat ninghannak, tvk. cu a hla thawn a rak phuangsuak, a irhsuaktir. Tu lai leitlun ih tingtang tum thiambik ti ih lar pakhat Rock Guitarist ‘Steve Vai’ khalin Interview ah “Rock awnmawi cu an rak cum vualvo dah, an rak relsiain an sawisel rero dah, asinan mawi le tha sin dingin kan tuah tha zo, thiamnak thawn kan thuam tha zo, awlsam le fiangfai dingin kan rem tha zo, rel ding cun rel cawk a si zik lo,…” a ti. Cun Germany ih Rock Star Scorpions ih Lead Vocalist ‘Klause Meine’ khalin Rock thu thawn pehparin Media pakhatin an suhnak ah “Thil tha lo [evil] tukih an hmuh hi cu a dik lo nasa…” tin a sim ve. Rock pu pakhat Ozzy Osbourne ih a umtudan le cangvaihdan ah “Na satanic tuk deuh a bang…” an ti tikah “Cu vek a si lo, mak dingin ka um hrim menmen a si hi…” a ti. Leitlun Heavy Rock/Metal ben ih hminthang zet pakhat Metallica ih Frontman le Lead Vocalist ‘James Hetfield’ tla a pa rori hi pastor a si ve si khawh, hi tivekih a um ruangah Khristian/Pathian fa a sinak a hlo, kan ti thei ding maw?

Tidai lawnglawng si loin tisa kan in duh can a um, ci lawnglawng si loin hmakphek kan hmeh duh can khal a um, thingpi thlum lawng si loin Coffee kha ruangro kan in duh can tla a um, serthlum hlir si loin serthur kan hiar can khal a um ve. Kan thisen tla a bangaw cio lo, kan ruahdan, kan hmuhdan le pawmdan tla a hmunkhat thei cio lo, mawi le tha kan ti mi le kan duhzawng khal a bangaw hai lo. Cuvekin awnmawi lam khalah mawi le tha kan ti mi le ngai nuam kan ti zawng an bangaw thei lo a si bik ko.

Curuangah a hleicein thangthar nonawn, mino lakah “Rock hla lo cu ka ngai paih lo, ngai nuam ka ti lo, ka di a riam thei lo,…” tvk. ih titu kan tampi ve ti hi a theithiam hrih lo pawlin kan theihthiampi a tul zet ding. Mai hmuhdan le theihdan lawng hi a dikbikah ruat loin a thatnak lam hawiih kan thlirsakawk thiam khal a tul zet.

Ziangkhal va siaw sehla, Rock-pawl cun; “Rock is Rock! Rock Alive! Rock Never Stops! Rock Will Never Die!...” tin an au kumkhua ko ding.

Awnmawi Thu + Hla Mallai

Thu le hla hi then ngaingai theih a si lo. Curuangah thuhla [thu+hla] tiin   kan ti theu. Leitlun ah awnmawi [music] tuah thiam lo, hlaphuah thiam lo le sak thiam lo tivek cu kan um ding nan awnmawi ngaina lo cu kan um lem lo ding. Kan duh dan, kan ngainat zawng a bangaw lo men fang a si. Minung nunnak hi awnmawi le hla thawn thlahaw thei kan si lo ih, sihcihaw mi a si.

A hleicein kannih Chinmi le Khristian hrangah tla cun awnmawi tel loin kan khawsa thei lo ti sehla a sual tampi lo ding. Kan Bible sung khalah hla tampi Pathian thunung phuansuahnakah hman a si. Thu cu hla ih phuansuah a si vekin hla khal thu ih hman a si theu. Thu ih kan theih mi, hmuhsuah mi pawl hla ih phuansuah a si tikah thinlung mi a sun thukin hmual a nei cuang a bang.

Minung kan nunnak ah awnmawi le hla thawn thlahaw thei kan si lo, kan ti zo bangin kan tawng khal hi hla phun khat [thluk nei ih tuah] a si. Kan thluk danih zirin kan thinlung um dan a langter. Cun awnmawi cu kan thinhengnak, riahsiatnak, lungawinak, thinharnak, duhnak, huatnak, tvk. phuansuahnak le langternak khal a si. Kan thinlung phurrit in sawng thei le in hnem theitu khal a si. Naute tawng thei hrih lo hman a tah [hla] ihsin a tuarnak kan theihsak thei.

Upa cu rel loh, naute bengek hmanin awnmawi an duhin an rak ngainat cuteh! Nau tingamnak ding le nau kan awih tik khalah an ngainat mi awnmawi pakhatkhat kan tuahsak theu a si lo maw? Hla ih hmual a neihnak langtertu pakhat a si. Ka u ih fapa Jason cu thla 6 mi fang a si. A tah le a ngam lo tikah awnmawi [hman ding] pakhatkhat kan pek le hla thawi' kan awih cun a ngam ve mai. Ihthahter kan duh khalah hla ih kan awih cun a itthat rang ce. Zianghman tawng thiam hrih lo asinan vawi khat cu a kiangah tingtang ka tum ih i zoh kuahko. Lungawi aipuang le lawmin a hni kerko. "Aw … naute ciapte khalin awnmawi hi an lawmin an va rak ngaina ve," ka ti.

Minung cu rel loh, rannung le thingkung pawl hmanin an rak ngaina ve an ti cuteh! Mi thiam pawlin rannung le thingkung pawl hi awnmawi ngaiter theu sehla an harhdamin an than a tha ce an ti. Curuangah ram tampi ahcun ran vulh mi le hmuan [dum] ih thlaihnah pawl hrangah awnmawi pakhatkhat an tuahsak theu. Cun Tuluk ram ahcun sizung ih mina ah [operation]   ding pawl cu an ah hlanah an ngainat zawng hla an ngaiter ta theu. Thinphan le huphurhnak ruangih thahri rin pawl a zalter ih ah a hlawhtling cuang tiin Tuluk sibawi pawlin an than. Curuangah sizung tinah hla ngai ding kimcang thei bikih tawlrelsak an tum rero ti a si. [The Mirror, 14-04-2003]

Ziangkim tuahnakah awnmawi tellonak ngaingai a um lo ti sehla a sual tampi lo ding. Sumdawnnak, lehnak, zirnak, sizung, zuknung, TV, Computer, Internet, tvk. ah phun khatkhat cun awnmawi hman tel ringring a si. Kannih Khristian pawl hrangah tla cun Pathian biakkhawmnak ah le Khristian nun hrimhrim ah [mi hrekkhat mi malte hrang siar lo] awnmawi le hla tel lo cun a cang thei lo tluk a si. Kan Pathian hi thangthat tlak Pathian a si vekin leitlun lawngah si lo, vanram kan thlen tiang hmanah cungnung bik Pathian cu kumkhua ih thangthat ding kan si.

 Awnmawi khawvel ih theih tha tete: 

·       Bible sungih hla kan hmuh hmaisat bik cu Israel pawl tipi sen an kan thluh ih, Moses ih Pathian thangthatnak hla   [Suah. 15:1-18] a si.

·       Bible sungih Carol hla sak hmaisa bik cu Vancungmi pawlin tukhal pawl hnenih an sah mi [Lk. 2:13] a si.

·       Bible sungih hla phuah tam bik cu Siangpahrang Solomon a si ih, hla fing 1005 a phuah [1 Siang. 4:32].

·       Bible ih hla bu 3 cu Solomon hla, Tah hla le Sam hla pawl an si.

·       Leitlun ih hla phuah tam bik kan theih mi cu Charles Wesley a si ih, a dam sungah hla fing 6000 lenglo a phuah.

·      Leitlun ih hlaphuahtu nauhak bik le hminthang bik cu Mozart [Austria mi] a si ih, kum 5 mi a si laiah "Twinkle, Twinkel Little Star" ti mi nauhak hla lar zet a rak phuah zo.

·       Tui ni tiang leitlun ih elbam zuar khawng tam bik cu Princess Diana hrangih an phuah mi "Candle in the Wind" a si. 1997 ah Elton John in a sak ih, ni 37 sungah elbam mil. 31.8 an khawng. A hlanih elbam khawng tam bikih an rel mi cu Bing Crosby ih "White Christmas" a si ih, kum 55 sungah mil. 30 an khawng.

·       Leitlun ih hlasak thiam, mipi neh thei bikih an rel mi cu Elvis Presley a si. Tui' sun ni tiang amah thluntu tampi in pawl dinin an um ih, Pathian tlukin an bia ti sehla a sual lo ding. Amai' ruangah mirang tawng thar a suah phah ih, Elvis [adj] = mi tirhsiang, ti'n hmun tampi ah an hmang. A sangtu ahcun The Beatles an si ih, a uartu pawlin pawl dinin an um ve. A uartu pawl kawhnak ah "Beatlemania" [Beatles at ih aa] ti mi mirang tawng thar a suah phah ve.

·        Tingtang ahhin A ihsin G tiang chord 150 lenglo a um.

·        Hla hmin se bik: "I Scream, You Scream, We All Scream For Ice Cream".

·        Hla hmin sau bik: "I've Got Those Woke Up Seven Thirty, Wash Your Ears, They Are Dirty, Eat Your Eggs and Oatmeal, Rush to School Blues".

Tingtang Arsi STEVE VAI

Tu lai awnmawi khawvel ih tingtang tum thiambikpawl lakah a tluntabiklam ih um ding arsi pakhat cu Guitar Hero/Star STEVE VAI hi a si. Anih hi 06 June 1960 kum ah a suak ih, US, New York, Carle Place ih thanglian a si. A nauhaktet lai ihsin awnmawi duhzettu a si ih, ben [band] din in mahte hla phuah le sak in a rak um theu. Ben dangdang din in le ben dangdang ah lut in a um vivo ih, zirhtu le simtu tha tla tawng in tingtang tum tla fumfezet in a hun zir peh thei vivo. Cutin mi group ih va tel rero tul nawn loin amah ten a hung ding thei ve thlang.

A zuamnak le a taimaknak zarah leilungtlun ih tingtang tum thiambikpawl lakah tel ban in leitlun mipi ih zohbik mi tingtang arsi pakhatah a hung cang thei. The Best Rock Guitarist tiin Readers’ Choice Awards kum tam nawn a rak ngah dah ih, The Best Rock Instrumental Performance tiin Grammy Awards khal a rak ngah rero dah. 1991 ah "Whispering a Prayer [Song for Ireland]" ti mi hla thawn Grammy award a rak ngah dah. Rock thuanthu ih upattlak pakhat a si ve mi Frank Zappa [thi zo] tla cun Steve Vai cu “My little Italian virtuoso” a si tin a rak lawm ve dah. Frank Zappa a dam laiah a ben ah Steve Vai a rak lut dah ih, Zappa hi Steve ih zirnak saya pakhat a rak si ve.

Tu ahcun leilungtlun ih tingtang tum thiambikpawl khalih upat mi le zohso mi a thiambik lam a si thlang. Hi tivek dinhmun ah awlai tei hung thleng thei mei cu a si hrimhrim lo. A nauhak lai ihsin thungaithlak in a zir in a cin [practice] theu.

Kum 14 hrawng a si ihsin ni khatah nahzi 12 sung, ni tinten a cin ringring theu. Exercise-pawl a tuah [cin] tik khalah a theh lai hlan lo, cawl lo le bang lo in a tuah theu. A cin hnuhnu cu a cawl nawn lo, zin/ek thiarawk khal a feh nawn lo, a theh lai hlan loh ti le rawl khal a in/ei nawn lo. Tum khat tla cu zan, zinglam nahzi 2 hrawng ihsin a cin thawk ih, a thai zan tiang cawl lo riaiin a cin peh vivo. A lehhnu ih Interview an tuahnak ah, “Ih khal ka it lo, rawlei can khalah ka kehlam kut in ka cin rero phah thotho, ka vawrhlam kut lawngin ka ei ih, tingtang ka thlah lo lawlaw, sunvui tingtang awn ka theih le ka um a nuam, tingtang awn a reh cun ka um khal a nuam thei nawn lo,” tin a sim. Cutin a hung hminthan hnu khalah ni khat nahzi 6 hrawng cu a cin ringring lai thotho.

Steve kum 10 hrawng a si kum 1970 ah a unu Lillian Vai thawn “Hot Chocolate” ti mi ben an rak din thawk. A unu in tingtang a tum ih Steve in hlasak, Bongos tum le record player a tuan. A unu khalin a sah a bawm ih, an hla phuah le khum hmaisatbik mi cu “Hot Chocolate” ti mi a si. A lehhnu ah, “OK Lil, tui zan nang tingtang rak cin aw la, kei thaisun ih kan tum ding hla fing 20 ka rak ngan ding, tiih ka unu thawi kan biakawk ka mang lai,” tin Steve in a sim. 1972 hrawngah cun “The Ohio Express” ben ah a tel thei ih, a thawkah cun Keyboards a tum nan a lehhnu cun Tingtang a tum thawk ve thlang.

“Tum khat cu kan tlawng ah show an ra nei ih, an cawlh sungah tingtang hunnak ih an hun mi tingtang cu zoh tha ka ti tuk ih, ti kuahko in ka rak zoh rero. Supaw thei lawn tingtang cu ka naih vivo, zohman in in hmu hlah hai seh tin thla ka cam nan mi pakhat in, “Hey Vai, khai tingtang naihah ziangha na ti?, ziangtin na ruat? hi group ah tla na tel thei ve men thei hokhaw”, tin i run ti ih, an zaten an hni vualvo, ka ningzahdan cu umngaihnak khal ka thei nawn lo.

G1 lole JOE SATRIANI

Tui san awnmawi khawvel ah                G3 ti cun zokhalin an thei thluh. Meithal si loin leilungtlun ih tingtang tum thiam bik an hril mipawl an si. G3 Live In Concert ti'n leilungtlun hmun dangdang ah Concert an tuah theu ih, cumi cu elbam [VCD/DVD] in an suah theu. Hmun dangdang ih an tuahnak ih tel G3 pawl cu mi  dangdang an si deuh theu. G3 tiih an hril mi lakah a tel theutu pakhat cu Joe Satriani hi a si.                                                                          

G1 lole JOE SATRIANI

Leilungtlun ih awnmawi ngainatupawl, a hleicein tingtang tum thiam pawl cun Joe cu an thei thluh deuhthaw a si ko. G3 lakih tel ve theu pakhat Steve Vai hi Joe hnenih rak zir dah tu a si. Passion & Warfare elbam ih a thiamnak suah mipawl parah Guitar Magazine in Vai cu a pawrh tikah Vai in, "Hi pawl hmuahhmuah hi Joe hnen ihsi ka ngah mi an si", ti'n a ti dah. Cun The Best Rock/Metal Guitarist vei tam nawn rak ngah dah tu Metallica ih guitarist Kirk Hammet le Testament ih guitarist Alex Skolnick pawl khal hi Joe ih zirh mi an si hai. Cu lo midang khal an tampi lai. Awnmawi phunsangtlawng kai tam tak cu tlawng an theh in Joe hnenah an ra ih, Joe ih guitar technique an ra hliakhlai theu.

Joe ih elbam tha zet pakhat a si mi "Surfing With The Alien" a suah hnu cun leilungtlun mipi in an theih phah sinsin ih, tingtang tum thiam pawl khalin an ngaisang sinsin. Joe cun Ibanez company in amai' kutthai [signature]  thawi' an tuahsak mi Ibanez JS Guitar a tum theu.

 Interview pakhat ah, "Ziangruangah 22 fret guitar lawng na hman theu?" tiih an suh tikah, "22 fret guitar ih neck cu body thawn a naiawk ruangah Mid awpawl a ngah tam ih, a awn khal a fiang, cun 24 fret lanih awnpawl cu Bend asilole W/Bar thawn ka tuah theu", ti'n a sim. Cun a hman theu mi pick up cu Diamizio Paf-pro, Dimazio Fred, IBZ AH1/AH2 pawl an si. Guitar Amp-Peavy, Marshall Digitech EFF le a dang EFF pawl khal a tul dandan in a hmang theu. Fender le Jason tingtangpawl khal Recording ah a rak hmang dah.

Asinan leitlun mi hminthang tingtang tum thiam hrekkhat cun an faksel ve theu ko. Yngwie J. Malmsteen cun, "Joe cu a tawk ko, asinan a tullonak ah Slur a hmang tam tuk theu, Sweeping le Harmonic Minor Scale hmannak ah kei tlukin a rang lo", a ti. Cun leitlun tingtang tum thiam bik tiih kum rei nawn hmin rak pu dahtu Van Halen khalin, "Joe cu Little Van Halen a si", ti'n a rak ti ve dah. Hrekkhat cun Joe le Malmsteen ih Scale hmandanpawl hi an bangaw deuh ti'n an ti theu nan a ngaingai ahcun an bangaw lo lawlaw. Joe cu hlapawl kha Scale-pawl thawn tumtu a si. Theory thawi' tum hnakin feeling thawn, hna thawn tumtu sawn a si. Joe in "Ka phuah ding mi hlapawl ih thulu le a thupawl ka hawl hmaisa, cu thehin Backing-pawl ka thun ih, cun Solo-pawl ka hawl theu", a ti.

Joe hman mi awn le Scale pawl hi ngai tikah an fiang fuahfo hai. Lydian Mode hi a hmang tam bik theu ih, Blues zikzik Rock & Roll khal a hmang theu. Cun Pentatonic, Minor, [Pure, Harmonic, Melodic Hungarian], Arpeggio scale-pawl khal a hmang phahphah theu. Surfing With The Alien elbam sungih hit pawl cu; Surfing With The Alien, Ice Nine, Crushing Day, Always, Echo, tvk. an si. Crushing day hi rang le mawi tha zet, a hit No.1 pakhat a si ih, Always hi cu muang le ti diahdo te, lunglenthlak zet pakhat a si ve.